د میدان وردګو د سوداګرۍ او پانګونې اتاق په ۱۳۹۲ لمریز کال کې تاسیس شو او د سوداګرو، صنعتکارانو، او دولتي ادارو ترمنځ د اغېزناک ارتباط یو مهم پل ګڼل کېږي. دا بنسټ سوداګریزو مشورو، د کارآفرینانو ملاتړ، پانګونې ته د اسانتیا برابرولو، او اقتصادي فرصتونو د رامنځته کولو له لارې د خصوصي سکتور د ودې لپاره مهم خدمتونه وړاندې کړي دي. په وروستیو کلونو کې، یاد اتاق د کوتل تخت صنعتي پارک جوړولو، د زراعتي سړو خونو ترمیم، د سیب د صادراتو د بازار پراختیا هند ته، او د سیمهییزو نندارتونونو د جوړولو په برخو کې فعاله ونډه اخیستې ده. د میدان وردګو اتاق اوس د ولایت په کچه د خصوصي سکتور د پراختیا او دوامدار اقتصاد د پیاوړتیا یو کلیدي بنسټ بلل کېږي.
په دې ناسته کې، د میدان وردګو د سوداګرۍ او پانګونې خونې رئیس الحاج میرویس ستانکزی، د پخواني رئیس الحاج نورآغا ابراهیمي، د خونی مرستیال الحاج اجمل شینوزاده، د اجراییه مسؤول زکریا نوري، د منی اتحادیې رئیس محترم مرسلین پاچا، الحاج عبدالحلیم همت، د صنعت او تجارت رئیس محمدخان زواک، او یو شمېر نور د خصوصي سکتور استازي حضور درلود.
د غونډې په پیل کې، محترم والي ګډونوالو ته د ښه راغلاست ویلو ترڅنګ، خپلې خبرې د ټاکل شوې اجنډا پر بنسټ پیل کړې. نوموړي د میدان وردګو ولایت د یوه مهم زراعتي ولایت په توګه یادونه وکړه او ټینګار یې وکړ چې د سړو خونو جوړول باید د سهمي پانګونې په بڼه او د خصوصي سکتور سره په نږدې همغږۍ پر مخ ولاړ شي. والي صاحب همداراز زیاته کړه، چې د دې بهیر د پيل او بریا لپاره اړتیا ده چې له خصوصي سکتور څخه هغه اشخاص چې متعهد، امین او وطندوسته وي، وپېژندل شي او مقام ولایت ته معرفي شي.
ورپسې، د خونې اجراییه مسؤول زکریا نوري د داسې غونډو هرکلی وکړ او ټینګار یې وکړ چې د مقام ولایت تر نظارت لاندې د دغو ناستو دوام به نه یوازې سوداګرو ته روحیه ورکړي، بلکې د پرمختګ او پانګونې لپاره به هم لاره هواره کړي
الحاج میرویس ستانکزی، د میدان وردګو د سوداګرۍ او پانګونې خونې رئیس، د دې غونډې د جوړېدو له امله د ولایت مقام څخه مننه وکړه او څرګنده یې کړه چې د میدان وردګو ولایت تاجران چمتو دي ترڅو د ستندرد سړې خونې په جوړولو کې، که په انفرادي ډول وي او که د سهامی له لارې، فعاله ونډه واخلي. خو له بده مرغه، ځینې ستونزې لکه د دوامدار برېښنا نشتوالی او د مناسب او ستراتیژیک موقعیت لرونکو ځمکو نهشتون، د دوی د هڅو مخه نیولې او د زړهتنګۍ سبب شوې ده.
د خونی مرستایل محترم اجمل شینوزاده وویل چې میدان وردګ د افغانستان له هغو مهمو ولایتونو څخه دی چې تر ۵۰ سلنه زیات د هېواد د مڼو تولید دلته ترسره کېږي. ښاغلي شینوزاده له اړوندو ادارو وغوښتل چې له خصوصي سکتور سره په نږدې همغږۍ کې دې د مناسبې ځمکې د وېش زمینه برابره کړي.همداراز، مرسلین پاچا، د مڼو اتحادیې مشر، د کرنیزو محصولاتو لپاره د عادلانه بیې نشتوالي او د بار وړلو په پروسه کې د ناعادلانه نوبت له امله اندېښنه وښوده او له چارواکو یې غوښتنه وکړه چې یادې ستونزې ته ژر تر ژره رسیدنه وشي، ځکه دا حالت د مڼو د بسته بندۍ او صادراتو بهیر له ځنډ سره مخ کړی دی. د اتحادیې غړو هم د غونډې پر مهال اشاره وکړه چې د افغان تاجران لپاره د واګه بندر تړل شوی دی او دوی اړ دي چې خپل محصولات د چابهار بندر له لارې هندوستان ته صادر کړي؛ دا لاره اوږده ده او د مڼو د انتقال پر مهال د زیانمنېدو خطر ډېر لوړوي
په پای کې، محترم الحاج خیرالله خیرخواه، د میدان وردګو ولایت والي، لارښوونه وکړه چې د دې ولایت د سوداګرۍ او پانګونې خونه دې هغه تاجران وپېژني چې صادق، ژمن او باوري وي، او د دوی نوملړ دې د راتلونکو همکاریو لپاره مقام ولایت ته وسپاري. غونډه د خیر دعا او د هېواد د تاجران او کروندګرو لپاره د بریا هیلو سره پای ته ورسېده